[المقاوم الجنوبي]

أنقذو حضرموت ...
📢📢📢📢📢📢📢
الشاعر/ رمضان باعكيم ( بوعهد )
أبديت بسم الفرد والكائن بجبروته يكون ..
رب السماء والأرض وعبيده لطوعه يسجدون ..
يا حضرة المسؤل والتاجر نباكم تلفتون ..
إن كان شي غيره. ووطنية بها با تنكوون ..
حمّى الضنك تفتك بنا وأنتوا صور تتفرجون ..
وين الأمانة والشرف يا نسل حمران العيون؟! ..
من حضرموت الخير بالثنتين كنتوا تأكلون ..
وعادكم لليوم منها يا سرقها تغرفون ..
واللحم لي في كتوفكم منها أفلا تتذكرون؟! ..
في وسعها أنتوا لها، ومن ضيقها تتهرّبون ..
أخسى عليكم يا قلال العرف لي ما تستحون ..
يالريّس المزعوم خيّبت النوايا والظنون ..
وين الحكومة؟ وينهم لي بالزعامة يزعمون؟ ..
فيين با حاح ابنها؟ وين الشنب وين الدقون؟ ..
وين المحافظ لي دفن منصبه في ذلة وهون؟ ..
وفين عصبة حضرموت اللي بها تتشدقون؟..
وفين إسم الحلف ياللي بالأمانة تحلفون؟ ..
معاد شفنا حد وقت الضيق من لي يخرطون! ..
أرض المكلا حاضنتهم مِنّها يتنكرون ..
ما غير عالشاشات بالهرج السهل يتمدحون ..
وهم حقيقتهم رذَل في ضيقها ما ينفعون ..
في مملكة سلمان أغلبهم وسيعين البطون ..
ماشي عمل غير اللقم من حين تشرق يلقمون ..
فيين تجار الحضارم؟ وين منصوب القرون؟..
وين الرجال إللي على الناموس منهم يحنقون؟ ..
بلادهم صاحت وهم لصياحها ما يسمعون! ..
بطلتْ تجارتهم اذا ما سددت عنها الديون ..
يارب تلطف بالحضارم أنت للمظلوم عون ..
صلى وسلم عالنبي كل من قرأ عمّا ونون ..
................................
باعكيم (بو عهد)